Një studim i fundit europian ka nxjerrë në pah një problem serioz shëndetësor që shpesh kalon pa u vënë re: sëmundjet kronike të mëlçisë. Sipas të dhënave, rreth 1 në 60 persona mbi moshën 40 vjeç mund të vuajë nga fibrozë e mëlçisë pa pasur asnjë diagnozë.
Studimi “LiverScreen”, ku u përfshinë mbi 30 mijë individë nga disa vende të Europës, tregoi se një përqindje e konsiderueshme e tyre kishte shenja të kësaj sëmundjeje, ndërsa një pjesë më e vogël rezultoi me diagnozë të konfirmuar.
Ekspertët theksojnë se rreziku lidhet ngushtë me stilin e jetesës. Faktorët kryesorë përfshijnë mbipeshën, diabetin e tipit 2 dhe konsumimin e tepërt të alkoolit. Kur këta faktorë bashkohen, probabiliteti për të zhvilluar probleme në mëlçi rritet ndjeshëm.
Një tjetër element i rëndësishëm është se sëmundja nuk lidhet vetëm me alkoolin, por edhe me probleme metabolike si tensioni i lartë apo çrregullimet e yndyrnave në gjak. Në shumicën e rasteve, bëhet fjalë për të ashtuquajturën mëlçi të dhjamosur, e cila zhvillohet në heshtje dhe pa simptoma të dukshme.
Mjekët paralajmërojnë se zbulimi i hershëm është kyç për të parandaluar përkeqësimin e gjendjes, pasi nëse lihet pa trajtuar, mund të avancojë drejt cirrozës. Lajmi i mirë është se shumica e faktorëve të rrezikut mund të kontrollohen përmes stilit të jetesës, duke përfshirë ushqyerjen e shëndetshme dhe aktivitetin fizik.