Gratë që përjetojnë menopauzë në moshë të re mund të përballen me pasoja më serioze për shëndetin e zemrës. Sipas një studimi të fundit, hyrja në menopauzë para moshës 40 vjeç lidhet me rreth 40% më shumë gjasa për zhvillimin e sëmundjeve koronare gjatë jetës. 
Menopauza konsiderohet e përfunduar pasi kalon një vit nga cikli i fundit menstrual, ndërsa mosha mesatare e saj është rreth 51 vjeç. Kur ajo ndodh më herët se zakonisht, ekspertët e lidhin me faktorë të ndryshëm si predispozita gjenetike, stili i jetesës, stresi apo zakone si duhanpirja. 
Studimi, i publikuar në një revistë të njohur mjekësore, analizoi të dhënat e mbi 10 mijë grave për dekada me radhë. Edhe pasi u morën në konsideratë faktorë si tensioni i lartë, diabeti apo mbipesha, rezultoi se menopauza e hershme mbetet një faktor i rëndësishëm rreziku për zemrën. 
Ekspertët theksojnë se ndryshimet hormonale, sidomos ulja e estrogjenit, ndikojnë drejtpërdrejt në sistemin kardiovaskular. Kjo është arsyeja pse periudha e menopauzës nuk duhet parë vetëm si çështje gjinekologjike, por si një fazë që prek të gjithë organizmin. 
Megjithatë, mbetet ende e paqartë nëse vetë menopauza e hershme është shkaktari kryesor apo nëse gratë që e përjetojnë atë kanë që më parë një predispozitë për probleme kardiake. Në çdo rast, specialistët rekomandojnë kontroll të rregullt dhe kujdes më të madh ndaj stilit të jetesës për të ulur rrezikun.