Disa mijëra civilë më shumë janë vrarë në Ukrainë gjatë 11 javëve luftë sesa shifra zyrtare prej 3.381 vdekjesh. Kështu ka deklaruar të martën shefja e misionit të OKB për monitorimin e të drejtave të njeriut.
Ekipi i OKB-së, që përfshin 55 monitorues në Ukrainë, ka deklaruar se pjesa dërrmuese e vdekjeve kanë ndodhur nga përdorimi i mjeteve shpërthyese si raketat dhe sulmet ajrore.
“Shifrat reale janë më të larta. Gropa e zezë e gjithë luftës është Mariupoli, ku ka qenë e vështirë për ne të depërtojmë dhe të marrim të dhëna të vërtetuara. Ne vlerësojmë se atje kanë ndodhur me mijëra vdekje, civilë që kanë humbur jetën si pasojë e akteve armiqësore. Sidoqoftë, na duhet ende t’i vërtetojmë këto të dhëna dhe s’mund t’ia shtojmë ato shifrave të konfirmuara”, thotw Matilda Bogner, shefe e misionit të monitorimit në Ukrainë.
Moska mohon të ketë sulmuar civilët dhe vazhdon ta quajë pushtimin e nisur më 24 shkurt një “mision ushtarak special” për të çarmatosur Ukrainën dhe për të asgjësuar ata që i quan nacionalistët anti-rusë, të frymëzuar nga Perëndimi.
Nga ana tjetër, Ukraina dhe vendet aleate të saj thonë se ky pretendim ishte një pretekst i rremë për t’i dhënë jetë konfliktit të paprovokuar.
Zyrtarja e OKB-së, Matilda Bogner tha më tej se ekipi i saj po heton edhe ato që i quajti “dyshime të besueshme” për tortura, keqtrajtime dhe ekzekutime të forcat ruse kundër pushtuesve rusë dhe grupeve të armatosura pro-ruse.
