Temperaturat e larta të verës e bëjnë kondicionerin pothuajse të domosdoshëm, por kur në shtëpi ka fëmijë, përdorimi i tij kërkon më shumë kujdes. Ekspertët këshillojnë që temperatura e ambientit të mbahet mes 24 dhe 26°C, pasi ky interval siguron freski pa krijuar ndryshime të forta termike që mund të ndikojnë te fëmijët.
Nëse temperatura jashtë është shumë e lartë, shmangni vendosjen e kondicionerit në nivele shumë të ulëta. Diferenca mes temperaturës së jashtme dhe asaj të brendshme nuk duhet të jetë më shumë se 4-5 gradë Celsius, për të mos i ekspozuar fëmijët ndaj një ndryshimi të menjëhershëm të temperaturës.
Po aq e rëndësishme është që rryma e ajrit të mos bjerë drejtpërdrejt mbi fëmijën. Drejtoni fluksin e ajrit lart ose anash, në mënyrë që freskia të shpërndahet gradualisht në dhomë. Gjithashtu, pastrimi i rregullt i filtrave ndihmon në shmangien e pluhurit, mykut dhe baktereve që mund të ndikojnë në shëndetin e frymëmarrjes.
Edhe gjatë natës nuk është e nevojshme ta fikni plotësisht kondicionerin nëse vapa është e fortë. Mjafton ta vendosni në 26-28°C, pasi kjo temperaturë ndihmon në uljen e lagështisë dhe krijon kushte më të rehatshme për gjumë.
Me pak kujdes në temperaturë, drejtimin e ajrit dhe mirëmbajtjen e pajisjes, kondicioneri mund të përdoret në mënyrë të sigurt edhe në shtëpitë ku ka fëmijë.