Harrojini për pak “5 gjuhët e dashurisë” që kemi dëgjuar prej vitesh. Sipas psikologëve, mënyra si njerëzit shprehin dhe përjetojnë dashurinë po ndryshon bashkë me kohën, teknologjinë dhe stilin e jetesës moderne. Sot, lidhjet romantike po ndërtohen mbi “gjuhë” të reja emocionale, që shpesh kanë më shumë peshë se fjalët apo dhuratat.
Ekspertët thonë se mesazhet e shpejta, mbështetja emocionale në momentet e vështira, respekti për hapësirën personale dhe aftësia për të qenë vërtet i pranishëm janë bërë forma të reja të dashurisë.
Një nga “gjuhët” më të rëndësishme moderne është prania emocionale, pra aftësia për të dëgjuar dhe kuptuar partnerin pa gjykim. Po aq e rëndësishme konsiderohet edhe komunikimi i qëndrueshëm, qoftë edhe përmes një mesazhi të thjeshtë gjatë ditës që tregon kujdes dhe interes.
Në listë përfshihet edhe respektimi i individualitetit, ku partnerët mbështesin njëri-tjetrin pa u përpjekur të kontrollojnë apo ndryshojnë tjetrin. Ndërkohë, vulnerabiliteti, ose aftësia për të treguar dobësitë dhe emocionet reale, shihet si një nga shtyllat e intimitetit të vërtetë.
Në fund, psikologët theksojnë se dashuria moderne nuk matet më vetëm me gjeste të mëdha romantike, por me mënyrën si dy njerëz arrijnë të krijojnë siguri emocionale, mirëkuptim dhe lidhje autentike në përditshmëri.