Një studim i fundit sugjeron se kritikat dhe ankesat e shpeshta në një marrëdhënie mund të kenë pasoja serioze për shëndetin, madje duke ndikuar edhe në jetëgjatësi. Sipas studiuesve, përballja e vazhdueshme me kritika krijon stres të vazhdueshëm, i cili dëmton jo vetëm mirëqenien emocionale, por edhe shëndetin fizik. 
Hulumtimi u realizua nga ekspertë të Kolegjit Lafayette në Pensilvani dhe përfshiu 1,734 persona të moshës nga 57 deri në 85 vjeç, pjesë e një studimi kombëtar mbi shëndetin dhe plakjen. Shumica e pjesëmarrësve ishin në marrëdhënie të qëndrueshme, dhe u analizua sa shpesh përballeshin me kritika nga partnerët e tyre. 
Rezultatet treguan se personat që përjetonin kritika të shpeshta kishin rrezik më të lartë vdekshmërie brenda pesë viteve. Studiuesit theksuan se ky efekt lidhet me stresin kronik që krijohet nga marrëdhëniet konfliktuale, i cili mund të ketë ndikim serioz në organizëm. Në disa raste, rreziku për të humbur jetën ishte dukshëm më i lartë tek ata që përjetonin kritika intensive. 
Ekspertët theksojnë se kritikat e vazhdueshme veprojnë si një formë stresi afatgjatë, duke ndikuar negativisht në shëndetin e përgjithshëm. Ky ndikim u vu re pavarësisht faktorëve të tjerë si mosha, pesha apo gjendja shëndetësore, duke treguar rëndësinë e marrëdhënieve të shëndetshme për mirëqenien dhe jetëgjatësinë.