Ja sa milionë ukrainas emigruan pas pushtimit rus!

Organizata e Kombeve të Bashkuara bën ditur se deri më tani janë larguar 4 milionë ukrainas që nga nisja e luftës me Rusinë. Një largim tronditës, ku shifra ekzakte e deklaruar nga UNHCR është 4,019,287 që nga 24 shkurti, dita kur nis pushtimi rus.

Më shumë 2,3 milionë ukrainas gjenden në Poloni. Ndërsa autoritet ukrainase kanë lëshuar një tjetër alarm sa i përket centralit bërthamor Çernobil. Zëvendëskryeministrja e Ukrainës, Iryna Vereshchuk, tha se forcat ruse që kanë marrë nën kontroll centralin e çmontuar bërthamor të Çernobilit duhet të tërhiqen nga ajo zonë, pasi forcat e armatosura ukrainase kanë paralajmëruar se mund të ketë shpërthim të municioneve.

“Ne kërkojmë nga Këshilli i Sigurimit i OKB-së që menjëherë të marrë masa për çarmatosjen e zonës së ndaluar dhe të vendoset një mision i posaçëm i OKB-së aty për të zhdukur rrezikun e përsëritjes së një katastrofe bërthamore”, tha ajo përmes një videoje të postuar më 30 mars në rrjetin social, Telegram.

Stafi ukrainas, sipas REL, ka vazhduar që të operojë me centralin e Çernobilit edhe pasi forcat ruse morën kontrollin e tij më 24 mars, në ditën kur Moska nisi pushtimin e Ukrainës.

Më 29 mars, kreu i Agjencisë Ndërkombëtare për Energji Bërthamore, Rafael Grossi, qëndroi në Ukrainë për bisedime me zyrtarët e lartë qeveritarë për të dërguar “ndihmën urgjente teknike” në mënyrë që të garantohet siguria e centraleve bërthamore ukrainase.

“Ne nuk mund të humbim më shumë kohë. Ky konflikt veçse ka shkaktuar dhimbje të paimagjinueshme njerëzore dhe shkatërrim. Ekspertiza dhe aftësitë e agjencisë janë të nevojshme që të parandalohet ndonjë aksident bërthamor”, tha Grossi përmes një deklarate.

Në deklaratë nuk u tha se sa kohë Grossi do të qëndrojë në Ukrainë. Që prej nisjes së luftës, Rusia ka marrë kontrollin edhe të centralit bërthamor në Zaporizhja.