Një mesazh zanor i publikuar së fundmi, ku aktori dhe regjisori Justin Baldoni i drejtohet koleges së tij Blake Lively duke e quajtur “beautiful” (“e bukur”), ka rikthyer në qendër të vëmendjes përplasjen e fortë mes dy yjeve të Hollywood-it.
Sipas mediave serioze amerikane, mesazhi daton nga fillimi i vitit 2023, gjatë përgatitjeve për filmin “It Ends With Us”. Në regjistrim, Baldoni shprehet i impresionuar nga pamja dhe prezenca e Lively gjatë provave të kostumeve, duke theksuar se ajo dukej “shumë e bukur” dhe se performanca e saj do të funksiononte në mënyrë perfekte për rolin.
Publikimi i këtij mesazhi vjen në një moment delikat, pasi Blake Lively dhe Justin Baldoni ndodhen në një betejë ligjore të hapur. Lively e ka paditur Baldonin për sjellje të papërshtatshme gjatë xhirimeve, akuza që ai i ka mohuar kategorikisht, duke i cilësuar si të pavërteta dhe të motivuara nga interesa të tjera.
Mesazhi zanor ka shkaktuar reagime të forta në rrjetet sociale. Një pjesë e publikut e sheh atë si një kompliment profesional dhe artistik, ndërsa të tjerë mendojnë se publikimi i materialeve private po përdoret si strategji për të ndikuar opinionin publik në prag të procesit gjyqësor.