Të rikthehesh tek një lidhje e vjetër mund të duket si diçka e njohur dhe ngushëlluese, por studimet tregojnë se kjo zgjedhje jo gjithmonë sjell lumturi. Sipas kërkimeve të fundit, personat që vendosin të mos rikthehen me ish-partnerin kanë tendencë të ndihen më të qetë emocionalisht dhe më të sigurt në vendimet e tyre.
Shpesh, lidhjet që mbarojnë kanë arsye të forta pas tyre. Edhe pse me kalimin e kohës kujtimet negative zbehen dhe mbeten më shumë momentet e bukura, kjo mund të krijojë një iluzion se gjërat mund të funksionojnë ndryshe herën e dytë. Por realiteti është se problemet bazë rrallë zhduken plotësisht.
Nga ana tjetër, ata që rikthehen në të njëjtën marrëdhënie shpesh përfshihen në një cikël të përsëritur ndarjesh dhe pajtimesh. Ky model krijon lodhje emocionale, pasiguri dhe ul ndjenjën e stabilitetit në jetë. Në vend që të ecin përpara, ata mbeten të lidhur me të shkuarën, duke e pasur më të vështirë të ndërtojnë diçka të re dhe më të shëndetshme.
Studimi sugjeron gjithashtu se personat që vendosin të mos kthehen tek ish-i fitojnë një ndjenjë më të madhe kontrolli mbi jetën e tyre. Ata janë më të fokusuar tek vetja, tek rritja personale dhe tek krijimi i marrëdhënieve më të balancuara në të ardhmen.