Me ardhjen e verës, shumë njerëz vënë re se ndihen më energjikë, më flirtues dhe me një dëshirë seksuale më të lartë. Sipas ekspertëve, kjo nuk është aspak rastësi. Rrezet e diellit, humori më i mirë dhe mënyra si ndryshon rutina gjatë sezonit të ngrohtë ndikojnë drejtpërdrejt tek libidoja.
Një nga arsyet kryesore lidhet me ekspozimin më të madh ndaj diellit. Drita natyrale ndihmon në rritjen e serotoninës dhe vitaminës D, elementë që ndikojnë pozitivisht në humor, energji dhe dëshirën seksuale. Ekspertët thonë se edhe testosteroni mund të ndikohet nga këta faktorë hormonalë.
Po ashtu, gjatë verës njerëzit priren të veshin më pak shtresa rrobash, të ndihen më të lirshëm me trupin e tyre dhe të socializohen më shumë. Daljet, pushimet, aktivitetet fizike dhe koha më e gjatë jashtë shtëpisë krijojnë më shumë afrimitet dhe tërheqje mes njerëzve.
Një tjetër faktor interesant është melatonina, hormoni që lidhet me gjumin. Ekspozimi në diell mund të ulë prodhimin e saj, duke bërë që njerëzit të ndihen më pak të lodhur dhe më aktivë gjatë mbrëmjeve.
Ekspertët shtojnë se vera shpesh lidhet psikologjikisht me relaksin dhe largimin nga stresi. Dhe sa më pak stres të ketë organizmi, aq më shumë rritet predispozita për afeksion, flirt dhe intimitet.