Kur biem në dashuri, nuk është vetëm zemra ajo që “flet”, por edhe truri dhe i gjithë trupi ynë kalojnë një transformim të vërtetë kimik. Shkencëtarët e përshkruajnë dashurinë si një “koktej hormonesh” që aktivizohet në tru dhe ndikon drejtpërdrejt në emocionet, sjelljen dhe madje edhe në shëndetin tonë fizik.
Në fazat e para të dashurisë, truri çliron më shumë dopaminë dhe noradrenalinë – dy substanca që lidhen me ndjenjën e kënaqësisë dhe euforisë. Pikërisht për këtë arsye mund të ndiheni më energjikë, me “flutura në stomak”, zemër që rreh më shpejt dhe mendime të vazhdueshme për personin tjetër.
Po ashtu, kur jemi të dashuruar aktivizohet sistemi i shpërblimit në tru, i njëjti mekanizëm që lidhet me ndjesinë e lumturisë dhe motivimit. Ndërkohë, disa zona të trurit që lidhen me gjykimin kritik “ulen”, gjë që shpjegon pse në fillim shpesh nuk i shohim qartë të metat e partnerit.
Me kalimin e kohës, pasioni i fortë fillestar transformohet në një lidhje më të thellë emocionale. Këtu hyjnë në lojë oksitocina dhe vazopresina, të njohura si hormonet që forcojnë intimitetin, besimin dhe ndjenjën e sigurisë mes partnerëve.
Ekspertët thonë se dashuria nuk ndikon vetëm në humorin tonë, por mund të përmirësojë edhe shëndetin mendor, të ulë stresin dhe të forcojë sistemin imunitar. Me pak fjalë, të jesh i dashuruar mund t’i bëjë mirë jo vetëm zemrës, por gjithë organizmit.