Prej muajsh, një detaj i vetëm po dominon botën e bizhuterive luksoze: diamanti oval. Nga daljet glamuroze të Georgina Rodriguez, tek stili minimalist i Hailey Bieber dhe eleganca romantike e Selena Gomez, kjo formë unaze po shihet kudo dhe po konsiderohet si simboli i ri i luksit modern.
Ekspertët e modës tregojnë se diamanti oval është rikthyer fuqishëm sepse kombinon elegancën klasike me një pamje më moderne dhe fine. Forma e zgjatur krijon iluzionin e gishtave më të hollë dhe i jep gurit më shumë shkëlqim, ndaj shumë vajza po e preferojnë më tepër se modelet tradicionale.
Në rrjetet sociale, hashtag-et për “oval engagement ring” po marrin miliona shikime, ndërsa shumë brand-e luksoze kanë shtuar kërkesën për këtë model. Influenca e personazheve të njohur ka luajtur një rol të madh, sidomos pas paraqitjeve të fundit të Hailey Bieber me stilin e saj clean girl aesthetic, që po frymëzon trendet e vitit.
Ndryshe nga unazat shumë të ekzagjeruara të viteve të kaluara, trendi aktual duket se favorizon luksin elegant dhe minimalist. Dhe mesa duket, diamanti oval është kthyer në detajin që çdo vajzë dëshiron këtë sezon.