Shumë persona zgjedhin të ushtrohen herët në mëngjes, shpesh edhe pa ngrënë, me idenë se kështu mund të djegin më shumë yndyrë. Por sa e vërtetë është kjo?
Sipas specialistëve, trupi ynë gjatë mëngjesit, sidomos pas një nate pa ushqim, ka nivele më të ulëta të karbohidrateve në dispozicion. Për këtë arsye, gjatë aktivitetit fizik ai mund të përdorë më shumë yndyrë si burim energjie. 
Megjithatë, kjo nuk do të thotë automatikisht se stërvitja në mëngjes është mënyra më efektive për të humbur peshë. Ekspertët theksojnë se humbja e kilogramëve varet më shumë nga balanca totale e kalorive gjatë ditës, sesa nga momenti kur ushtrohesh.
Nga ana tjetër, ushtrimet me stomakun bosh mund të mos jenë të përshtatshme për të gjithë. Disa njerëz mund të ndihen më të lodhur, të kenë më pak energji dhe të mos arrijnë performancën e duhur gjatë stërvitjes.
Në fund, koha më e mirë për t’u ushtruar është ajo që i përshtatet stilit të jetesës dhe e bën aktivitetin fizik të qëndrueshëm në afat të gjatë.