Aktori amerikan Shia LaBeouf është arrestuar në New Orleans pas një përleshjeje të dyshuar, që sipas raportimeve ndodhi pas disa ditësh konsumimi të alkoolit gjatë festimeve në qytet.
Sipas dëshmitarëve dhe stafit të bareve lokale, aktori ka shfaqur sjellje të pazakontë dhe agresive, duke lëvizur pa bluzë në ambiente publike, duke u përfshirë në debate me klientët dhe duke shkaktuar edhe lëndime trupore.
Lajmi u publikua fillimisht nga TMZ, ndërsa më pas u konfirmua edhe nga Variety, që raportoi se arrestimi lidhet drejtpërdrejt me incidentin, për të cilin u kërkua edhe ndërhyrja e shërbimeve mjekësore emergjente. Sipas dokumenteve gjyqësore, LaBeouf përballet me dy akuza për sulm me një armë vdekjeprurëse.
Ndërkohë, The Hollywood Reporter shkruan se aktori kishte krijuar shqetësime në qytet për disa ditë radhazi, ndërsa në rrjetet sociale qarkullonin pamje që tregonin sjelljen e tij të çrregullt. LaBeouf, i cili më herët ka folur publikisht për periudhat e tij të maturisë, dyshohet se ka rifilluar konsumimin e alkoolit që nga e enjtja e kaluar.
Një video e shpërndarë online e tregon atë duke u konfliktuar jashtë një bari pasi iu refuzua shërbimi i alkoolit, megjithëse besohet se ky episod nuk lidhet drejtpërdrejt me arrestimin.
Një roje sigurie, Robert Skuse, deklaroi se aktori u paraqit i dehur dhe pa bluzë në ambientet e lokalit. “Ai ishte mjaft agresiv dhe iu kërkua të largohej, pasi po përpiqej të sillej si një ‘i famshëm’ që mund të bënte çfarë të donte,” u shpreh ai.